تعامل جديد بين الشاعر حاتم حسن الدابي والفنان جعفر السقيد

حاتم الدابي

كلمات الشاعر حاتم حسن الدابي
قصيدة قلم وكراس وحتة عيشة تحكي قصة حقيقية حصلت في امدرمان الثورة بطلتها طالبة في مرحلة الاساس

يا أستاذة أقري وِشِيشة
فيهو براءة تعكس فِيشة
شوفي الشنطة وزن الريشة
شنو الجابرك علي فِتِيشة
تراكي لقيتي في هِبيشة
قلم وكراس وحِتّة عِيشة
*******************
دي خضعت للحياة وقانونة
تطبق فيها كل فنونة
في أيام نُحس ومجنونة
طفولتة من بدت محزونة
تنوم في قِطعة من كرتونة
غُطاها وسُترة دُلقان خِيشة
*********************
فاضي علي الدوام ماعونة
اصبعة فُرشتة ومعجونة
مافي شي يتلصق في سنونة
ولا مُحتاجة لي صابونة
ربنا بس يكون في عونا
ويديها الصبر تحويشة
******************
هي تقعد للعِصير جيعانة
تلقِط ع(شان تعشي اخوانة
ممرضة امها العيانة
أدتة حِن وهي فاقدة حنانة
فِعلاً طفلة صِح إنسانة
تقري وشايلة هم العيشة
*******************-
بالنهار شمس الله قاجي عِروضة
وبالليل تنهشة الباعوضة
البيت حوش موسطة أوضة
زي الكعبة في بيوضة
يعملو إيه حياة ومفروضة
رغم الصَغَرَة برضو تعيشة
*********************
لا في سرير ولا في مِلاية
ولا بتجاز ولا في لداية
لا شماعة ولا مصلاية
بيت لا حلة لا كباية
بالباب تدخل الغنماية
وبالشباك يسترو الخيشة
**********************
ناس بتنوم وتحس بالحسرة
لا في علاج لا في لقمة كسرة
سرطان هدّا جسد الاسرة
ومافي وجيع في ساعة الحسرة
أوضة الفيها جمعاً أسري
لا حمام ولا في عريشة
*********************
شافعة ولاصقة فيها دِلوقة
تبكي وعبرتة المخنوقة
علي الهم المجسم فوقة
تشيل عشرتكم المسروقة؟
لا استاذ يراعي حِقوقة
رغم برائتة وتهميشة
**********************
خمسة سنين محطة محطة
مافي إنسان بهبش الشنطة
فتحتة تعني اكبر ورطة
ريحة العيشة تطلع شطة
هي مادام في الفصل منضبطة
ليه عايزين تجيبو الشرطة
هددتوها ليه بالنقطة
في المكتب وقف شاويشة
***********************
دي طفلة مَيَتَمَة ومحرومة
فوق الدنيا رامية همومة
حالة ابوها عند القومة
ورقدة امها المكلومة
شوفي نِعالة شوفي هِدومة
فترانة ومنكشْ نِيشة
**********************
يعني عشان ما ورتك موضوعة
ماقطّع حشاكي دموعة
ماحسيتي وجعتة نوعة
إنها مُتعبة وموجوعة
علي مرضة وعِراها وجوعة
تاني تقع عليها نبيشة
********************
هو الجوع والعلم بتلمو؟
في طفلاً مكابد همو
فرّة أبوهو…مرضة أمو
لا جيرانو لا اولاد عمو
لا زول في النقيصة يتمو
لا لِقي حتي حظ الكِيشة
*********************
ترا الاستاذة تهرج فيها
شايلة السوط وصارة وشيها
وديك ماسكاها من ايديها
هي قالت كِلمة صِح تعنيها
شنطتي فاضية شيْ مافيها
طلبتك بالرسول خليها
فيها رسالة ما تقريها
يا استاذة كوني نبيهة
الا العشرة والله العظيم مافيشة
***************
ياما ناس كترة الفاقة
لامن أفسدت اخلاقة
شُلَلِيات سوا بتتلاقة
بين امواج وسوق الناقة
كُندشنات هواهة دُقاقة
قبل النومة جبنة وشيشة

تعليقات الفيسبوك

اضف تعليق